Ríki Sagnfræðingurinn

Tók mér góðan gang í rigningu dagsins upp á lögreglustöð. Enda var hjólinu mínu stolið síðustu fríviku. Gangurinn var skemmtilegur og hús miðbæjarins með skemmtilegan sjarma. Kaffihús Hljómskólagarðsins olli mér vonbrigðum hvað heita súkkulaðið var (týpískt vélarsúkkuluaði, ekki gott). Þegar á Hverfisgötuna var komið var mér vísað áfram í Borgartún 7B. Þar fór ég í gegnum kaldranalega stálhurð, niður hringstiga, niður annan stiga, inn einhvern hringlaga gang, inn um aðra kaldranalega stálhurð og hitti síðan vinalega lögreglukonu í þessum niðugrafna kjallara. Mig langar til þess að vera á þessum stað þegar sprengjuárás verður gerð. Hjólið mitt var ekki á staðnum, kem aftur seinna og tékka.

Ég ákvað að ganga upp Skúlagötuna og fór þá framhjá skrifstofu Eskimo, þar var örugglega módel úti að tala í símann, hún var hærri en ég og fótleggirnir voru mjórri en tannstöngullinn sem ég hélt á (eða því sem næst).

Gekk inn í port sem ég vissi ekki af, það var skemmtileg lífsreynsla.

Gekk inn í Þjóðskjalasafn Íslands til þess að tilkynna það að ég ætlaði mér ekki að vera þar í dag.

Gekk niður laugaveginn og virti fyrir mér búðirnar og kíkti í Vínberið, þar var fyrirtaks útsala á ýmsum gæðavörum, t.d. súkkulaði, keypti smá.

Hitti Hönnu Guðnýu með vinkonu sinni.

Stoppaði á Kaffihúsi við Skólavörðustíg og fékk mér alvöru heitt súkkulaði meðan ég las yfir viðskiptagreinar Helga Vífils í Morgunblaðinu, það var hressandi og upplýsandi. Ég ætla mér ekki að kaupa í Landic Property, lítur ekki vel út.

Svona göngutúrar eru svo til alltaf upplýsandi.

Þingvellir aftur á morgun. Frívikan hefur verið strembnari heldur en almenn vinnuvika. Búinn að mála hjá tengdó eins og brjálæðingur þó er það ánægjulegt þegar fólkið er svona þakklátt og ánægt með það sem gert er.

Ég og Eybjört fórum í klippingu hjá Stellu frænku...fyrir vikið er Stella uppáhalds frænkan þessa dagana.

Merkilegt nokk er ég andskoti oft sammála brosandi froskinum. Ekki alltaf og kannski deili ég ekki alveg sömu skoðun um orsök og afleiðingar í ýmsum hlutum. En þegar maðurinn fer að tjá sig um samgöngumál þá uppljómast ég en því miður verður lítið úr framkvæmdunum. Ég fagna því að minnka skuli áherslur á einkabílinn og leggja kapp á almenningssamgöngur, hjólreiðar og tvo jafn fljóta. Þessi áhersla má þó ekki vera bundin við 101/107 heldur þarf að ná út í úthverfin líka. Tökum nokkur dæmi:

1. Strætó á sunnudögum byrjar að ganga á milli 11-12 sem segir mér það að ef ég byggi í Breiðholti/Grafarvogi gæti ég svo til ekkert ferðast nema með bíl á sunnudögum.
2. Strætóferðir um helgar eru einkar stopular. Ein ferð á klukkutíma, sumar lagðar niður og allt þarf að kynna sér vel og vandlega á netinu, því það er búið að breyta um kerfið þrisvar síðan að áætlanabókin kom út. Kerfið verður fyrir vikið ómarkvisst og fælir fólk frá því, jafnvel mig.
3. Það gengur engin strætó beint milli Mjóddar og Grafarvogs. Ef ég er ekki að fara með rangt mál þarftu að taka 6 úr Grafarvogi niður í Skeifu, fara út þar, yfir Miklubraut með göngubrúnni og ná þristinum þar (gæti verið til skipting í Ártúnsbrekkunni).
4. Enginn strætó gengur beint milli Hafnarfjarðar og Mjóddar hins vegar er hægt að taka 1 frá Hafnarfirði í Hamraborg og þaðan 4 yfir í Mjódd. Þessir strætóar eru þó að mig minnir samtengdir tímalega séð svo vandamálið er ekki stórvægilegt.
5. Oft er það bagalegt að margir strætóar sem eru á sömuleið er settir á sama tíma eða mjög nálægt, oft munar ekki nema einni mínútu eða stundum tveimur (t.d. leiðirnar sem fara vestur í bæ úr Mjóddinni) eða þær sem fara austur eftir inn að Kringlu eða Skeifu úr Vesturbænum (1, 3, 6, 14).
6. Afsláttarkort ættu að vera markvisst ódýrari og jafnvel gefa afslátt fyrir fjölskyldur svo fólk sjái sér virkilega hag í því að velja strætó umfram einkabíl (þarf ekki að vera ókeypis, er ekki þannig í Norðurlöndunum).

Jákvæðu punktarnir:

1. Í Kópavoginum er ágætis safnkerfi úr öngum Kópavogs sem enda í Hamraborginni þar sem farþegar geta skipt yfir í hinar meginleiðirnar sem bera þau í Hafnarfjörð(1) eða RVK (1 og fleiri leiðir).
2. Neita þessum mýtusögum um að ef maður taki strætó þá sé maður heila eilífð að ferðast. Vissulega fer þetta eftir því hvaða leið þú tekur, hvort aðalleið sé valin (1, 2, 3, 4, 5 og 6) eða safnaleiðir.
Það tekur 25 mínútur að komast frá Háskólanum yfir í Hafnarfjörð (okei 28 mínútur ef þú ferð í Fjörðinn).
3. Það tekur 25-30 minútur að ferðast frá Vesturbænum yfir í Spöngina með 6.
4. Það tekur 20 mínútur að ferðast með leið 12 yfir á Kleppsveg (miðað við Laugarásbíó).

Að ferðast tekur tíma, auðvitað þarf fólk að meta það hvernig það reiknar tímann sinn, hvað það metur hann á. Ég bý við viss forréttindi, á auðvelt með að fá bíl lánaðan, en miðað við hvað ég nota bíl sjaldan og þarf í raun enn sjaldnar á honum að halda væri það engan veginn hagstætt að kaupa bíl. Hrein klikkun í raun sem myndi hafa þær afleiðingar að ég neyddist til að vinna meira sem myndi aftur skapa meira stress og minni tíma með fjölskyldunni.

Get ekki verið fylgjandi stórtækum skattahækkunum sem leggjast á vísitöluna og hækka hana, hreint fáránlegt.

Held ég myndi endast sem einstætt foreldri í viku...síðan væri ég búinn af lífi og kröftum...tek ofan. Fimmtán tíma vakt og viðtaka Eybjartar strax morgunin eftir sjö tíma svefn var síðan fínn endir á annars fínni keyrslu. Hún er annars áberandi byrjuð að sakna mömmu sinnar.

Hvað varðar þingherbergin þá næ ég ekki að einhver flokkur geti átt eitthvað herbergi. Þetta er ekkert mál, ef VG kúkar á sig á þessu kjörtímabili þá fær Framsókn bara herbergið aftur. Hins vegar er það staðreynd að Framsókn hefur ekkert með þetta risaherbergi að gera.

Hvað er hægt að segja annað en sumar, sól og brosað út að eyrum.

Reykjavíkurborg slær í gegn með því að lækka laun starfsfólks OR og reikna sér í leið arð. Frábært. Í raun þarf samt að lækka laun margs af starfsfólki OR, ekkert óeðlilegt við það sé tekið mið af því að svipup launalækkun gekk yfir alla starfsmenn borgarinnar nokkru fyrr.
Það skemmtilega við þessar bókhaldsbrellur er að það má næstum því rökræða það að þetta skref sé rökrétt. Að því gefnu að hægt er að fá eitthvað lán þá er mjög líklegra að OR fái það en RVK og reyndar líka á mun betri kjörum. OR er með eitt besta lánshæfismatið á Íslandi.

Eybbjört tekur stórstígum framförum í samkeppnishæfni barnanna. Um daginn talaði hún ensku (að eigin sögn var hún að tala ensku) og nú í gær ákvað hún að ná smá skynbragði á þróunarkenningunni. Við vorum fjölskyldan að skoða bók með dýrum og þarna var mynd af apa, Eybjört kom með þessa snilldarsetningu: "Þetta er api, hann er frændi okkar."
Magga kunn hafa verið að skýra út fyrir henni áðurnefndar þróunarkenningu.